چکلے / ساحر لدھیانوی

یہ کوچے یہ نیلام گھر دلکشی کے

یہ لٹتے ہوئے کارواں زندگی کے

کہاں ہیں کہاں ہیں محافظ خودی کے

ثنا خوانِ تقدیسِ مشرق کہاں ہیں؟

یہ پر پیج گلیاں یہ بے خواب بازار

یہ گمنام راہی یہ سِکّوں کی جھنکار

یہ عصمت کے سودے یہ سودوں پہ تکرار

ثنا خوانِ تقدیس مشرق کہاں ہیں؟

تعفّن سے پر نیم روشن یہ گلیاں

یہ مسلی ہوئی ادھ کھلی زرد کلیاں

یہ بکتی ہوئی کھوکھلی رنگ رلیاں

ثنا خوانِ تقدیسِ مشرق کہاں ہیں؟

وہ اجلے دریچوں میں پائل کی چھن چھن

تنفس کی الجھن پہ طبلے کی دھن دھن

یہ بے روح کمروں میں کھانسی کی ٹھن ٹھن

ثنا خوان تقدیسِ مشرق کہاں ہیں؟

یہ گونجے ہوئے قہقہے راستوں پر

یہ چاروں طرف بھیڑ سی کھڑکیوں پر

یہ آواز کھنچتے ہوئے آنچلوں پر

ثنا خوانِ تقدیس مشرق کہاں ہیں؟

یہ پھولوں کے گجرے یہ پیکوں کے چھینٹے

یہ بے باک نظریں یہ گستاخ فقرے

یہ ڈھلکے بدن اور یہ مدقوق چہرے

ثنا خوانِ تقدیس مشرق کہاں ہیں؟

یہ بھوکی نگاہیں حسینوں کی جانب

یہ بڑھتے ہوئے ہاتھ سینوں کی جانب

لپکتے ہوئے پاؤں زینوں کی جانب

ثنا خوان تقدیس مشرق کہاں ہیں

یہاں پیر بھی آ چکے ہیں جواں بھی

تنو مند بیٹے بھی، ابا میاں بھی

یہ بیوی بھی ہے اور بہن بھی ہے ماں بھی

ثنا خوان تقدیسِ مشرق کہاں ہیں؟

مدد چاہتی ہے یہ حوّا کی بیٹی

یشودھا کی ہم جنس رادھا کی بیٹی

پیمبر کی امت، زلیخا کی بیٹی

ثنا خوانِ تقدیس مشرق کہاں ہیں؟

بلاؤ خدایانِ دیں کو بلاؤ

یہ کوچے، یہ گلیاں، یہ منظر دکھاؤ

ثنا خوانِ تقدیس مشرق کو لاؤ

ثنا خوانِ تقدیس مشرق کہاں ہیں؟


آپ اسے کتنے ستارے دینا چاہیں گے؟


Show More

1 thought on “چکلے / ساحر لدھیانوی”

  1. بسم اللہ الرحمٰن الر حیم
    مکرمی ومحترمی جناب مدیئر صاحب
    السلام علیکم ورحمتہ اللہ وبرکاتہ

    سب سے پہلے تو میری جناب سے دوبارہ اجرا پر دلی مبارک باد قبول کیجئے ا سکے بعد عرض ہے کہ آج مکرم ومحترم جناب عبدالحئی ساحر لدھیانوی صاحب کے کلام کو دیکھ کر کچھ پرانی مگر سہانی یادیں ذہن میں در آئیں تو سوچا کہ کیوں نہ آپ کا اور آپ کے سامعین کو بھی ان سے لطف اندوز ہونے کا موقع ملے ۔ اس لئے اپنا کلام اور اس کی وڈیو آپ کے ای میل کی معرفت آپ کی خدمت میں بھجوا رہا ہوں ۔ اگر مناسب سمجھیں تو اپنے اس مجلہ کی وساطت سے اپنے قارئین کو بھی لطف اندوز ہونے کا موقع دے کر ممنون فرمائیں ۔

    سلامت رہیں ۔ آپ کے مجلہ کی کامیابی کے لئے دعا گو

    والسلام مقصود احمد نسیم ازجرمنی

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے

Close